اتصل بنا من نحن

تسجيل الدخول

مستخدم جديد

عاوز نوكيا روح لراية

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-05 00:00:00

شارك المقال

محدش فينا يقدر ينسي الإعلان المشهور جداً عن "النوكيا" فى قمة مجده (عاوز نوكيا روح لراية) وده كان إعلان بتربط فيه "راية" بشكل مباشر بينها وبين "نوكيا" كأنهم حاجة واحدة وده طبعاً لأن فى الوقت ده كانت "نوكيا" هى الوكيل الوحيد وكانت "نوكيا" مكتسحة جميع الماركات التانية فى الموبايل ... المهم إن "نوكيا" بعد فترة دخلت وكيل آخر وهو شركة "رينج" تحت دعوى إن الشركة أخدت الوكالة عن شمال أفريقيا كلها مش عن مصر فقط .... ورغم إن مبيعات راية وصلت لمليار و200 مليون جنيه مصري إلا إن "نوكيا" فاجئتها ودخلت وكيل تالت اللى هو "آى تو" اللى بدأت تدخل السوق المصرى بقوة وهي كانت وكيل لنوكيا فى 12 دولة ..... المهم إن "راية" أدركت في الوقت ده إنها صعب جداً تبقي وكيل لنوع واحد من الموبايلات وتربط نفسها بيه والشركة نفسها كل فترة بتدخلها منافس يبيع عليها وبدأت الشركة اللى كانت عملت اسم قوي مع "نوكيا" في مصر تتجه لأنواع تانية زى "سامسونج" و"ألكاتيل" وغيرها لكن النجاح كان مع "نوكيا" والارتباط كان مع "نوكيا"

اللى حصل ده بيحصل كل يوم وده اللي خلي الدولة تعدل في قانون الوكالات التجارية في محاوله لحماية الوكيل لكن طبعاً موضوع القانون ده فى النهاية مش هجيب حق التعب والمجهود في نشر البراند .....

طيب إيه الحل ؟؟؟

-  علشان نتكلم عن الحل لازم نفرق بين "الوكالة" و"الفرانشيز" وطبعاً "الفرانشيز" اتكلمنا عليه قبل كده كتير وعملنا فيديو عنه وهو شبه شراكة بين صاحب البراند والوكيل إنما لو انت وكيل أو موزع مش فرانشيز تعمل إيه؟

- لازم تفهم إنك لو موزع أو وكيل لمنتج في منطقة أو حتى في دولة كاملة إنك بتكبر منتج مش بتاعك في النهاية وممكن صاحب المنتج يدى لغيرك بعد فترة تحت بنود مختلفة زى مثلاً إنه حاطط تارجت للمنطقة دى أكبر من حجمك وهو عايز ينمو وانت مش قادر على طموحاته رغم إنك بتكون بذلت مجهود كبير علشان تسوق المنتج في النهاية فلما بدأ المنتج ينتشر يبدأ يكلمك علي إنك اللي مقصر ... أو تحت بند إنك بتعامل العملاء وحش وإن فيه عميل أو أكتر اشتكوا للتوكيل من المعاملة أو تحت حجج كتير جداً.

-  فيه بقى أحيان تانية بيطمع الوكيل في المنطقة لدرجة إنه بيجي هو نفسه يفتح فيها بعد طبعاً ما انت صرفت عليها دم قلبك وعرفت الناس المنتج وتحت حجج كتير منها إن التكلفة عليت علشان الدولار رفع فمش هيقدر يطلعلك النسبة اللي تكفيك .

-  في كل الأحوال مهم جدا إنك تاخد بالك وتعمل الآتى :-

1 - لا تقصر نفسك على براند واحد مهما كان حجم أو نوع أو قوة البراند ده ومتحطش نفسك تحت ضرس صاحب البراند مهما كان كبير لأن دى مخاطرة وحتى لو شركة عرفت إنك مثلاً بتعتمد عليها 100% هتقرفك في المعاملة وفى الأسعار .... فيه بعض المؤسسات اللى بتشتغل فى التوزيع بتحط سقف مثلاً 10% حد أقصى لأى براند من نسبة مبيعاتها ... ممكن تبقى 20 أو حتى 30 مش أكتر .

2 - لو حصل واعتمادك على براند عليت بالنسب دي ياريت الشركه نفسها متعرفش ... خللى فيه منافسة بين الموردين ومتفهمش مورد إنك معتمد عليه بشكل كبير .

3 - متصرفش على أى براند مهما كان من فلوسك ... إنت بتصرف علي شركتك أو محلك كدعايا إنما مش علي منتج أو براند عندك إلا لو الشركة دى هتديلك مقابل سواء كاش أو بضاعه أو حتي نسبة خصم .

4 - خد من كل شركة اللى هى متميزة فيه ... متحاولش تجامل شركة وتاخد منها منتج مغمور أو جديد أو غير مجرب قبل كده ومحدش يلزمك لأنك مش فرانشيز .

5 - خليك مستشار للعملاء بتوعك ... يعني إنت مثلاً محل نضارات فعندك 10 ماركات فبتحاول تحط نفسك كراجل محايد مش متحيز لأى براند لأنك هنا كسبان وهنا كسبان غير لما تكون عندك براند واحد فبتحاول تجمله للعميل وخلاص وهي دي نقطة تفوقك عن محل واخد براند واحد .

6 - خليك أمين مع عميلك ... يعني لو يناسبه منتج معين وانت مكسبك فيه ضعيف مش مشكلة متحاولش تبيعله المنتج التاني اللي مكسبك فيه كبير وهو مش مناسب ليه .... حتى لو وصلت إنك متبيعلوش خالص ... الموضوع غير إن الأمانة دين إنما كمان بتبني ثقه قوية جداً عند العميل هتخليه في يوم يشتري منتج من عندك وهو أرخص في مكان تاني ثقة فيك :)

7 - حافظ على علاقة شخصية جيدة بعملائك ومتخليش حاجات بسيطة تبوظها لأنهم رأس مالك اللى الشركات الكبرى متقدرش مهما صرفت تعمل العلاقة دي ... فى النهاية فكر إن البراند هيفتح جنبك بكره وانت هتنافسه إيه اللي يخلي العميل يسيبه ويتعامل معاك ؟؟؟

8 - وفر لعملائك خدمات إضافية ... زى الصيانة ... المعلومات.... النصائح ..... إلخ

9 - أوعى تحت أى مسمى أو أى بند تدى الشركة بيانات عملائك سواء عامة (زى انت بتبيع بكام في الشهر) أو بيانات خاصة ( زى أرقام تليفونات وعناوين)

المهم فى النهاية إنك تبقي ماسك سوقك وحتى لو براند فتح بنفسه هتبيعه برضه وسط باقى المنتجات فى النهاية انت اللى معاك الكونترول مش براند مهما حصل هو اللى يتحكم فيك

وربنا يوفق الجميع ويدى كل واحد على أد نيته وسعيه

تسويق