اتصل بنا

تسجيل الدخول

مستخدم جديد

كيف تدير بيزنس وقت الأزمات ؟؟؟ ج7

قراءة المقال باللغة الفصحى

الكاتب :

اعمل بيزنس

تاريخ النشر :

2016-12-28

مشاهدات :

558

شارك المقال

في سنة 2008 في أحد اللقاءات مع شركه من أكبر شركات مصر فى الإستثمار المباشر اللي كانت في الوقت ده عايزة تستثمر معانا في الشركة .. سألت مدير الإستثمار بتاعها ... ايه اللي يخللي شركة كبيرة بحجم شركتك تدخل في علاقة استثمارية مع شركه متعثرة زى شركتنا .. أنا كنت عايز أعرف إيه اللي عجبهم فينا ... المنتجات ولا الميزانيات ولا إيه بالظبط ؟؟؟....

رد عليا : انت ... في الشركات الصغيرة والمتوسطة التقييم بيقى مركّز علي صاحب الشركة بنسبه كبيرة وانت مؤمن بشركتك وواثق دايماً إنك هتنجح رغم إن الشركة متعثرة في الوقت الحالي وعندك رؤية للمستقبل نقدر نبني عليها ...

الرد ده علمني حاجة مكنتش واخد بالي منها إنك إنت كصاحب الشركة المعيار الوحيد للشركة دي ... الموظفين بيشوفوا في عينيك الشركة دي مكملة ولا لأ ... هتنجح ولا لأ ... لو انت يأست الشركه هتقع لو انت كملت الشركه هتعدي :)

علشان كده في مجموعة صفات لازم تتوفر فيك كصاحب مشروع وقت الأزمة علشان تكمل وتنجح كمان هنقولهم بسرعة ....

أولاً الإصرار والتحدي

هل بتستسلم بسهولة ؟ هل انت متخيل إن النجاح مجرد فسحة وسهل إنك تحققه ؟ هل بتتخلي عن حلمك بسهولة ؟ ولا انت معتبرها معركة ومنافسة ولازم تخرج منها كسبان ولازم تدي 100% من مجهودك مش أقل من كده علشان تنجح .. :)

ثانياً طول النفس والصبر والاستعداد لمعارك طويلة ....

لو حد بيفتح مشروع علشان سنة أو اتنين الأفضل له يستثمر فلوسه في مكان مختلف ... اللي بيعمل مشروع بيعمله لسنين قدام ولازم لازم يمر بنجاحات وإخفاقات وممكن يلاقي الإخفاقات الأول فميستعجلش لازم يبقي نفسه طويل ويلعب لحد آخر دقيقه من آخر ماتش ..

ثالثاً البحث عن أسواق جديدة

اتكلمنا فى النقطة دي كتير إن في حالة الركود في السوق المصري قدامك السوق الخليجي أو الإفريقي أو الأوروبي لو منتجك متميز وممكن تدور علي سوق جديد حواليك لعميلك ..... زى ماقلنا لو فيه محل بيبيع فساتين حريمي ممكن يبيع شنط أو أحذية حريمي وممكن يزود اكسسوار كل دي بتعتبر أسواق جديدة ...

رابعاً التفاؤل وحسن الظن بالله

أكيد ربنا سبحانه لأنه عادل مش هيضيع حد بيشتغل بجدية وأمانة فلازم الواحد يشتغل وهو متفائل وعنده يقين إنه هينجح :)

خامساً الثقة بالنفس

لازم يبقى الواحد واثق من نفسه وفاهم إن طالما فيه حد بينجح في السوق ليه ما يبقاش زيه وأحسن منه كمان ؟

سادساً يكون عنده رؤية ..

بدون رؤية للمستقبل مش هتصبر على التضحية فى اللحظة الحالية وده اللى بيفرق بين شركة وشركة ... فيه شركات بتشتغل للزمن الحالى وفيه شركة بتشتغل للمستقبل ... لازم تكون شايف المستقبل وشايف نجاحك فيه علشان تصبرعلى الأزمة ...

دى مجموعة من الصفات اللي لازم تتوفر في صاحب الشركة أو صاحب المشروع علشان يقدر يدير بيزنس ويعدي بيه من أزمة لنجاح .. طبعاً فيه حاجات تانية كتير زى الثبات الإنفعالى والحذر لكن دول اللي حبيت أتكلم عنهم الحلقة دي وإن شاء الله نشوف ايه اللي هيكسبه أي بيزنس لما يعدى فترة الأزمة من غير ما يقفل في الحلقة الجاية إن شاء الله 

تسويق