اتصل بنا

تسجيل الدخول

مستخدم جديد

الجمهور عايز إيه ؟

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-01

مشاهدات :

1698

شارك المقال

النهاردة هنتكلم عن المدرسة الخامسة وهى مدرسة التسويق الكلى أو المتكامل ...
المدرسة تعتبر امتداد للمدرسة الرابعة أو هى التطور الطبيعى لها وهى تحويل التسويق كمفهوم يطبق على العميل لمعرفة إحتياجاته إلى مفهوم يتعامل مع كل من يتعامل مع الشركة ويطبق حتى مع الموردين مثلًا أو الموظفين أو حاملى الأسهم أو الشركاء أو حتى المجتمع وده بشكل إجمالى .... يعنى الشركة كوحدة بتدير علاقتها مع كل من يتعامل معها من منظور تسويقى أو منظور إرضاء الجميع (بمعنى أدق الحرص على إرضاء الجميع) .
طيب ده يحصل إزاى ؟ يعنى نترجم الكلام الكبير ده من أى إتجاه ؟ يعنى عمليًا نعمل إيه ؟
الموضوع علشان يبقى بسيط وقابل للتنفيذ قالوا هيتعمل على أربع مستويات كل مستوى بيخاطب فئة معينة أو مفهوم معين ...
أولاً : بناء وتحسين العلاقات :
هنا هيكون دور التسويق هو بناء وتحسين العلاقات مع كل من يتعامل مع الشركة (ماعدا الموظفين والعملاء) لإقامة علاقات قوية طويلة المدى مبنيه على الإستفادة من الجانبين وبناء عليه يتم بناء قسم للعلاقات العامة مثلاً يهتم ببناء هذه العلاقات .
أمثلة من دور القسم فى حالة التعامل مع الموردين ... عمل حفلة سنوية ودعوة جميع الموردين الذين تتعامل معهم الشركة .... حل مشكلة الموردين فى تحصيل مستحقاتهم من الشركة .... مراجعة الاتفاق مع الموردين .... شركة "بى أند جى" مصر عندها قسم لتطوير الموردين .
فيه برضه شركات كتير جدًا وفى مصر عندها قسم أو إدارة اسمها إدارة علاقات المستثمرين وده بيبقى فى الشركات المساهمة اللى فيها عدد مستثمرين كبير ودى بتعنى بإرضاء المستثمرين من حيث الإجابة على استفساراتهم أو بيان مشروعات الشركة الجديدة .... الخ .
وكمثال شركة أوراسكوم للإنشاءات بتبعت نشرة شهرية مطبوعة بكل الأنشطه لجميع المستثمرين بالبريد .....
ثانيًا :إنشاء وإيصال الأنشطة التسويقية للعملاء :
وده الدور الطبيعى جدًا وهو عمل برامج لتوصيل المنتجات والخدمات للشركة لعملائها أو ما يطلق عليه المزيج التسويقى أو ال Marketing Mix
وده هايتم شرحه بالتفصيل فى أجزاء متقدمة فى الحلقات واللى بيطلق عليها ال 4Ps واللى أصبحوا دلوقتى 7Ps ...
ثالثًا التسويق الداخلى :
واحدة من أهم المشاكل اللى بيقع فيها شركات كتير هى إهمال التسويق 
للشركة فى الداخل والتسويق هنا مقصود بيه أكتر من نقطة ...
هل موظفين الشركة فاهمين الشركة بتعمل إيه ؟؟ ولا كل واحد باصص على مهامه بس ومش شايف حاجة تانية ....
هل مديرين الشركة فاهمين تسويق وفاهمين الرسالة التسويقية اللى الشركة بتحاول توصلها .. ؟؟؟
كان فيه مرة قسم تسويق نزل أوفر فى أهرام الجمعة على صفحة كاملة أيام ماكانت أهرام الجمعه حاجة جامدة جدًا وموظفين الاستقبال معندهمش فكره عن الإعلان والناس اللى كانت بتتصل كان بيتقالها لا مفيش عندنا السعر ده علشان قسم التسويق نسى يقول قسم الكول سنتر إنه منزل عرض بالشكل ده .....
رابعًا قياس أداء الأنشطة التسويقية :
جزء من التسويق الكلى هو تحليل كل نشاط تسويقى وتكلفته والعائد منه على الشركة لمن يهمه الأمر ... ومن يهمه الأمر هنا هم الإدارة العليا والإدارة المالية والمساهمين فى الشركة .... يعنى التسويق مش مصروفات وخلاص وميزانية بيتم اعتمادها أول السنة ونقعد نصرف فيها لأ دى مسئولية أمام من يهمه أمر الشركة سواء مساهمين أو موظفين أو حتى جهات حكومية ..... حتى الأنشطة الخيرية اللى غرضها تحسين شكل الشركة فى المجتمع لازم تبقى مفهومه وموضحه ومحلله ......
كل واحد فينا يقدر يطبق مفهوم التسويق الكلى على شركته مهما كان حجمها .. حتى لو إدارة العلاقات العامة كانت عبارة عن سكرتيره بتتصل تعزم الموردين فى رمضان على إفطار بسيط وشوف النتيجة هاتبقى عامله إزاى ؟
أتمنى بنهاية البوست ده إنى أكون قدرت أوصل مفهوم جيد للتسويق يخلينا نقدر ندخل أكتر فى التسويق ونستوعب أكتر علم التسويق بما يحسن من شركاتنا ويخلينا نتقدم أكتر إن شاء الله

تسويق