اتصل بنا

تسجيل الدخول

مستخدم جديد

أستثمر في مشروع ولا أستثمر في الدولار ؟

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-05

مشاهدات :

830

شارك المقال

الواحد لو تعب وقدر إن يبقى عنده مشروع أياً كان المشروع ده إيه حتي لو كان كشك كلفه 100 ألف ج بس بقى بيحققله 5 آلاف ج في الشهر ... الكشك ده ممكن يقيّمه بكام ؟

الكشك ده ممكن نقيّمه بنص مليون جنيه لأن العائد بتاعه هو عائد نص مليون ج في البنك بعائد 12% في السنة

المشروع مش بس قيمة أرباحه التجارية اللي بتدخل كل شهر المشروع كيان له عائد شهري وله قيمة بتزيد كل ما أرباحه بتزيد .

كان فيه حد من أصدقاء صفحتنا على الفيس بوك بيكلمني على الموبيل وهو حاسس إن إرتفاع الدولار ده أذاه يعني هو اللي كسبه ضيعه إرتفاع الدولار فأنا سألته هو انت بتتاجر في الدولار قاللي لأ .... قلتله ليه بقى بتقيس كل حاجة بالدولار فقاللي لأني لو كنت حولت فلوس الشغل لدولار كان هيبقى مكسب ليا أنا ردي بسيط إنت بدأت مشروعك إمتى ؟ في 2005 .... طيب معدل العائد بتاعك كام ؟ من 25% ل 80% في السنة طيب تعالى نحسب على 25% ..... في 2005 كان سعر الدولار 6 ج لو انت كنت اشتريت دولار وقتها والنهارده ب 12 ج الدولار يبقى حققت 100% بينما في ال 10 سنين دول انت حققت 250% يبقى أكتر بكتير ده غير إن مشروعك نفسه اللي انت عملته من 10 سنين دلوقتي له قيمة أعلى بكتير لو بعته وبعدين إنت النهارده بتفترض إنك كنت هتعرف إن الدولار هيعلى فتشتريه من سنتين وتبيعه النهاردة طيب ما اللي شغالين في التكييفات كسبوا كويس الصيف ده ..... ليه ما تقارنش نفسك بتجارة التكييفات وتقول ياريتني كنت قلبت تجارتي في التكييفات

المكسب في أي تجارة بيعتمد على وجودك فيها لفترة طويلة فيبقى فيها صعود وهبوط فماينفعش أقارن مشروعي أو تجارتي بحركة دولار أو دهب .

اللي ممكن أقارنه لو أنا سنة 2005 حطيت فلوس في البنك بعائد 12% مثلاً ولو حولتهم دولار .... أو اشتريت دولار مقابل إني إشتريت شقة أو أرض وبرضه هلاقي إن العقارات غليت إرتفعت أكتر من إرتفاع الدولار في الفترة دي .

طيب الواضح إن أي مقارنة بين أي إستثمار والدولار هيبقي ضد الدولار .... طيب المضاربة في الدولار هي مضاربة آمنة ؟؟ لأ طبعا لأن موضوع الدولار بيدخل فيه عوامل كتير جداً إقتصادية وسياسية ... أول مرة الحكومة عوّمت الجنيه الدولار إرتفع من 3.4 ل 6 ج في يوم واحد وبعدين انخفض ل 5.5 وثبت على كده 7 سنين ورا بعض .... فهل التعويم المرة دي هيعمل إيه ؟ طيب ال 12 مليار دولار اللي مصر هتقترضهم بعيداً عن جدوى القرض بس تأثير القرض ده علي الدولار مش ممكن ينزله ل 11 ج مثلا ؟ طيب لو روسيا رجعت السياحة لمصر ... روسيا على فكرة رجعت علاقتها بتركيا بعد ما كان فيه حرب غير مباشرة بينها وبين تركيا وصلت إن تركيا وقعت طيارة لروسيا ومع كل ده رجعت العلاقات الروسية التركية وأردوغان إجتمع ببوتين لأن المصالح الإقتصادية بين البلدين لا تحتمل الخلاف وده مثال إن الخلاف السياسي ممكن يتحل في يوم وده هيأثر علي الدولار وممكن ينزله ل 10 ج

عموماً المضاربة على الدولار خطرة جداً وبتتأثر بعوامل إقتصادية وسياسية معقدة وبتتغير في يوم وليلة وممكن تقعد وقت طويل ثابتة إنما أي مشروع بيعتمد علي جهد مبذول وفكر وعرق وتعب وحاجة بتكبر كل يوم وممكن تورثها لولادك

في النهاية دي كانت ملخص لمكالمة طويلة بيني وبين أحد أصدقاء صفحتنا على الفيس بوك وحبيت أنقل رأيي ليكم وبالتوفيق للجميع

تسويق