اتصل بنا

تسجيل الدخول

مستخدم جديد

اعرف عميلك عاوز ايه

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-01

مشاهدات :

443

شارك المقال

البحث التسويقى مهم للشركات علشان تعرف رأى العميل فى المنتج أو الخدمة سواء جديد أو قديم ومهم جداً نعرف ان البحوث التسويقية بتغير من اتجاه شركات على مستوى العالم لكن السؤال هنا هو كيفية عمل بحث تسويقى يعنى إزاى نعمل بحث نجاوب على سؤال أو نعرف رأى الناس فى منتج ؟؟؟
الموضوع له إختيارين إما إنك تكون بتمثل شركة كبيرة فتروح تتعاقد مع شركة متخصصة وهى هتقوم بكل ما يلزم وتقدملك نتائج البحث جاهزة (يفضل برضه تبقى فاهم هى بتعمل إيه علشان تعرف تحاسبها ) أو إنك تكون صاحب مشروع صغير أو متوسط أو بتشتغل مدير تسويق فى شركة متوسطة ومفيش ميزانية فتقوم إنت بالبحث لوحدك ....
الموضوع مش بسيط وبرضه مش إختراع للذرة .. مجموعة خطوات بتاخدها بشكل مرتب علشان توصل للنتائج الأخيرة وللقرار الصائب ...
أولاً تعريف المشكلة أو الموضوع .... نقطة الإنطلاقة إنك تكون فاهم إنت عايز إيه ... إيه هو السؤال اللى إنت عايزله إجابة لأن فيه ناس كتير مش قادرة تحدد هى عايزة إيه .... يعنى مثلاً مينفعش نحط عنوان ( أنا عندى محل فى شارع عمومى إيه أنسب مشروع له ؟) طبعًا دى مشكلة غير قابلة للحل أو بمعنى أصح مفيش عميل هايعرف يجاوب عليها والموضوع هيبقى إجتهادى قوى إنما ينفع يبقى السؤال بالشكل ده ( عمل مطعم يقدم مأكولات بحرية بالعنوان كذا ) ده ينفع يبقى عنوان بحث إنك عايز تعمل مشروع معين فى مكان معين وعايز تعرف الناس ممكن تتقبل فكرته ولا لأ .... لو لاحظنا فيه حد عمل بحث قريب عن فكرة تقديم عصير القصب فى المولات الكبري زى مول العرب وسيتى ستارز ونتيجة البحث كانت إنه مشروع ناجح وفعلاً بعد كده المشروع لما فتح كان عليه إقبال .
ثانيًا وضع خطة البحث .... الموضوع بسيط فى خطة البحث هانتفق على إننا هاناخد كام عينة؟ سن الناس هايبقي إيه؟ رجالة ولا ستات؟ هاننزل نقابل الناس ولا هانكلمهم تليفون ولا هنعمل فوكس جروب اللى هى تجمع من ( 5- 10 ) عملاء وندردش معاهم؟ هنعمل إيه معايير إختيار الناس؟ إزاى نخللى الناس تتعاون يعنى هانديهم فلوس ولا جوايز ولا إيه ؟؟؟؟...... إلخ
ثالثًا وضع الأسئلة التفصيلية ..... ودى أهم مرحلة ولازم نبقى حريصين فيها جدًا ... إزاى نحط أسئلة بسيطة جدًا يكون الإجابة عليها سهلة لأى شخص غير متخصص لكن لو جمعنا الأسئلة دى مع بعض هنقدر نوصل لقرار .... يعنى لو بتعمل أسئلة عن مياه معدنية مثلاً متحطش سؤال بيقول بتشرب كام لتر فى اليوم لأن محدش من غير المتخصصين يقدر يعرف هو بيشرب كام لتر إنما ممكن تسأل بتشرب كام مرة وفى كل مرة كام كوب .... ده بس مثال بسيط إنما طبعًا المهم إنك تفكر بعقلية العميل مش بعقلية صاحب المشروع أو المتخصص .
رابعًا تجميع البيانات ..... ودى أكتر مرحلة مكلفة فى المشروع ككل يعنى مثلاً لو بتعمل بحث على نوع أجهزة طبية معينة مخصصة للأطباء يبقى هتاخد مثلا رأى 100 طبيب ... شوف بقى كل زيارة هاتكلفك كام؟ من إختيار مندوب ينفع الطبيب يقابله وتدريب المندوب ده بشكل معين وهدية للطبيب علشان يتعاون أو حتى هدية له بعد التعاون تقديرا لوقته ..... الخ ممكن تلاقى إن الزيارة هتكلفك 100ج مثلاً يعنى المرحلة دى هتتكلف حوالى 10 آلاف ج وده مبلغ بسيط جدًا لو قارنته بمنتجات تانية بتبقى عايز لها عينة أكبر مثلاً .....
خامسًا تحليل المعلومات ..... ودى مرحلة بسيطة محتاجة حد عنده قوة ملاحظة وفاهم علم الإحصاء ( فيه برامج كمبيوتر بتعملها ) اللى هى هتطلعلك فى الآخر إن الإناث ممن شملهم البحث تحت سن ال 30 مثلاً إختاروا نعم للمنتج بنسبة 80% بينما فوق سن ال 30 إختاروا نعم بنسبة 50% ..... إلخ
سادسًا تقديم المخرجات والوصول لقرارات .... طبعًا مما سبق هيتتضح لنا إن المنتج الجديد ده كويس وله سوق لكن لو تم استهداف النساء تحت سن ال 30 ... إنما سوقه ضعيف للنساء فوق سن ال 30 وهكذا ....
ده الشكل الأكاديمي علشان توصل لبحث تسويقي أنا عارف إن الموضوع طويل وشكله أكاديمي إنما مهم جدًا نعرفه لأنه من الحاجات الخطيرة جدًا لأى حد عنده بيزنس وطبعًا لو عندك مشروع قائم هتجيب قايمة العملاء بتوعك وتوزعهم على المبيعات أو خدمة العملاء وتخللى كل واحد يعمل اتصالات وتجيب أراء العملاء
هنتكلم فى البوستات اللى جاية عن أمثلة محلية وعالمية عن المشكلات اللى قابلت الشركات اللى معملتش بحث تسويقى لمنتجاتها 

تسويق