اتصل بنا

تسجيل الدخول

مستخدم جديد

ميزانية التسويق

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-06

مشاهدات :

1907

شارك المقال

ميزانية الدعاية أو التسويق 

فيه أكتر من سؤال وحوار تم عن ميزانية الإعلانات والتسويق ووجدت إن فيه مفاهيم خاطئة كتير عن الإعلانات ...

أولا ميزانية أو مصاريف الإعلانات دي زي الإيجار والكهرباء والمياه ورواتب الموظفين بتدفع كل شهر سواء موسم أو لأ ..سواء الدنيا شغاله أو واقفه بل أحيانا لو الشركة فيها أزمه مصروفات أو تعثر بتقدم علي كل البنود لأنها لو وقفت الشغل بيقف والتعثر هايطول إنما مع وجود الإعلانات ممكن يبقي فيه مبيعات تقوم الشركة من التعثر 

 

ثانيا مفيش ربط بين ميزانية الإعلانات والشهره يعني لو أنا منتجي مشهور يبقي بلاش أعمل إعلانات واللي بيربط الإتنين ببعض يتفرج علي بيبسي وكوكا كولا أظن مفيش أشهر منهم ومع ذلك علي طول بيعملوا إعلانات 

 

ثالثا تحليل المبيعات... لو معاك فلوس تقدر تشتري برنامج (CRM) يبقي لا تتردد لو غير متوفر أحصل عليه بنظام الإيجار لو لم يتوفر أيضا يبقي إشتغل بشكل يدوي ....يعني ملف إكسل مثلا أو حتي بالورقه والقلم ....والتحليل ده يومي وأسبوعي وشهري وسنوي لازم تعرف إيه أفضل إعلان بيجيبلك مبيعات وإيه ارخص إعلان بيجيب مبيعات ...يعني لو بتدفع في الفيس بوك ألف ج بيجيبلك 5 عملاء وجوجل ألف ج بيجيبلك 10 عملاء يبقي زود جوجل وده طبعا في حالة تساوي القوة الشرائية للعملاء إنما لو عميل الفيس بوك مثلا بيشتري ب 3 أضعاف عميل جوجل يبقي الفيس أفضل وهكذا (هاننزل بوستات منفصله عن تحليل المبيعات ) . 

 

رابعا أهداف الحمله مش بيع بس....أحيانا علشان اسمك يكبر وده هايجيبلك عملاء علي المدي البعيد وأحيانا للحفاظ علي عملائك الحاليين علشان يحسوا إنهم بيشتغلوا مع حد جامد وكبير وعلشان طبعا محدش يكون بيصرف أكتر منك فياخدهم ...

 

خامسا من 15 سنه كده كنت علشان تعمل حملة إعلانية لازم يبقي معاك 200 ألف ج مثلا تدفعهم مقدم لحمله مع وكاله وتقسط الباقي بشيكات علشان تنزل جرايد وتليفزيون وإعلانات طرق فكان الحملات الإعلانيه مقصورة علي الكبار ...الحمد لله دلؤقتي أصبح فيه جوجل وفيس بوك وتويتر وإنستجرام بتقدر عن طريقهم تعمل حمله حتي لو ب 200 ج في اليوم وكل العملاء بجميع أنواعهم متوفرين يعني عندنا في مصر 30 مليون حساب فيس بوك متوفرين تقدر تستهدفهم فلو سمحت لا تقصر في استخدام التكنولوجيا الحديثة وادفع في البند ده كويس سواء هاتستعين بمتخصص أو بشركه متخصصه أو حتي تتعلم بنفسك الموضوع مش بسيط ومش معقد (إن شاء الله هانعمل دورة أون لاين عالية المستوي هايديها أفضل حد في الشرق الأوسط بيدرس تسويق إلكتروني كمان شهر تقريبا في أول دورات أكاديمية إعمل بيزنس ) .

 

سادسا الحاله الوحيده اللي نوقف فيها هي الإعلانات هي إن يبقي عندنا شغل فوق طاقتنا ووقتها ممكن نقلل الحمله لأقل مستوي أو حتي نوقفها لإعادة ترتيب أوراقنا وتجهيز شغلنا وأحيانا لرفع أسعارنا ونبدأ تاني .

 

في كل الأحوال لازم نعرف إن فيه دورة فلوس بتبدأ إنك تدفع فلوس إعلانات يجيلك عميل تبيع له يديلك فلوس تمول بيها العمليات من شراء بضاعه أو تصنيع أو تشغيل وخلافه ....إيقافك للإعلانات معناها إنك توقف الدورة أو تشتغل بالقصور الذاتي زي كده لو شيلت رجلك من علي البنزين العربية هاتفضل تمشي شوية وبعد كده هاتقف ....ربنا يوفقكم ويكلل جهودكم وياريت لا ترفع قدمك من علي البنزين أبدا ....

تسويق