اتصل بنا

تسجيل الدخول

مستخدم جديد

السيارة لا تعمل من فضلك اشتريها

قراءة المقال باللغة الفصحى

الكاتب :

اعمل بيزنس

تاريخ النشر :

2016-11-14

مشاهدات :

1585

شارك المقال

هنكمل النهاردة بقية الامثلة وهنعرف قصة العربية اللى مش بتمشى 
اتكملنا قبل كده عن أهمية إنك قبل أى خطوة هتاخدها للتسويق لمنتجك إنك تعمل بحث تسويق أو ال Marketing Research لأنه هيديلك القدرة إنك تعرف إحتياجات الأسواق اللى بتستدهفها واللى بنيت خطتك التسويقية عليها .
طب إيه درجة أهمية نقطة زى كده فى بداية عملية التسويق ؟
هنشرح هنا مثال وهنعرف فى الآخر درجة أهمية إجراء البحث التسويقى .. شركة جنرال موتورز واحدة من أكبر شركات صناعة السيارات فى العالم وطبعًا فى أمريكا .. أنتجت جنرال موتورز عربية جديدة إسمها شيفروليه نوفا ( Chevrolet nova ) سنة 1962 وبدأت مبيعات العربية تحقق أرقام كبيرة ( فى الحقيقة العربية إكتسبت شهرة طاغية وكانت معروفة بإسم الأسطورة ) .
نجاح المبيعات داخل أمريكا دفع جنرال موتورز للتفكير فى تصدير العربية للخارج وتحديدًا للمكسيك ودول أمريكا الجنوبية ومنها فنزويلا وده كان فى سنة 1972 .
لكن نجاح المبيعات فى أمريكا ما اتحققش فى المكسيك خالص وهنا ظهرت مشكلة شيفروليه نوفا هناك .. المبيعات كانت ضعيفة جدًا أو شبه منعدمة بشكل ملفت للنظر بدون سبب واضح .. المديرين التنفيذيين اللي قاعدين في مكاتبهم في أمريكا فى جنرال موتورز معرفوش يعملوا إيه .
الأسطورة فشلت فى المكسيك فشل ذريع لغاية أما اكتشفوا السبب ..
المشكلة كانت فى إسم العربية ( Nova ) .. المكسيكيين لغتهم الرسمية هى الأسبانى والترجمة الحرفية لكلمة ( Nova ) بالأسبانى يعنى No ) ) لا ( Va ) تمشى .. يعنى شيفروليه مش بتمشى !!
بذلت جنرال موتورز مجهود كبير من خلال حملات لتغيير الصورة الموجودة فى أذهان المكسيكيين وإن العربية بتمشى بدليل إنها حققت مبيعات كبيرة فى أمريكا .. تم شرح نقط كتير عن جودة العربية فى ال Manual بتاعها .. كثفت من جهودها مع شبكة موزعين جنرال موتورز فى المكسيك لكن الحاجز اللى كان عامله الإسم فى أذهان المكسيكيين كان كبير جدًا وللأسف فشلت كل المحاولات لغاية أما تم تغيير إسم العربية لشيفروليه كاريبى ( Chevrolet Caribe ) .
طبعًا مش محتاجين نأكد على أهمية البحث التسويقى وإن إزاى شركة بحجم وسمعة جنرال موتورز لو كانت عملت الخطوة دى كانت حققت مبيعات كبيرة جدًا فى أسواق خارج الولايات المتحدة .
إدرس سوقك كويس وخلى بالك إن أصغر نقطة أو معلومة ممكن تكون نقطة تحول لصالحك أو ضدك قبل بداية البيزنس الخاص بيك .
وياريت ننزل من مكاتبنا المكيفة ونحتك بالمستهلك وبلاش نفترض إفتراضات فى دماغنا ونبنى عليها خطط ونصرف عليها فلوس والافتراضات دى مش فى دماغ العميل بتاعنا

تسويق