اتصل بنا

تسجيل الدخول

مستخدم جديد

برتقان على السريع

قراءة المقال باللغة الفصحى

الكاتب :

اعمل بيزنس

تاريخ النشر :

2016-12-04

مشاهدات :

431

شارك المقال

طب تعالوا نعرف النهاردة ايه حكاية بياع البرتقان وازاى عمل بحث سوق !!
لما تكون مهتم بشغلك وصاحى مع العملاء وتقدر تفهم إحتياجاتهم وقريب منهم أكيد هتعرف تضاعف مبيعاتك بسهولة .... معرفة إحتياجات العميل من خلال بحوث السوق وقربك منه هو السر وهو المفتاح والموضوع مش محتاج فلسفة وكلام كبير محتاج بس تشغيل دماغ .
شدتنى كلمة وأنا بعمل ماجستير فى الإدارة إن علم الإدارة هو تحليل الممارسات الناجحة لرواد الأعمال يعنى فيه ناس كتير نجحوا من غير ما يدرسوا إدارة قام العالم شاف هما نجحوا إزاى وبدأ يحط ممارساتهم كقواعد علشان هما وصلوا لها بعد محاولة وخطأ فالعلم بيوفرعليك المحاولة والخطأ وبيحط ليك القاعدة اللى وصلها اللى قبلك .
كل ده افتكترته لما حد حكالى إنه اشترى 5 كيلو برتقال من البياعيين اللى بيقفوا على الطريق السريع ودى أول مرة يعملها فسألته ليه المرة دى بالتحديد واحنا أصلاً بنخاف نقف على الطريق السريع علشان مفيش عربية نقل لاقدر الله تبقى جاية بسرعة فقاللى البياع ده تحديدًا عمل أكياس ( شنط ) كل واحد فيه 5 ك تديله ال 5ج يديلك الكيس من غير وزن ولا تعبئة ولا انتظار للباقى فتقريبًا عملية البيع دى مبتخدش 30 ث .... البياع اللى ممكن ميكونش راح المدرسة عمل تحليل لسلوك العملاء من خلال بحث سوق سريع فى دماغه ولقى إن معظمهم بيبقى عايز يشترى بس المشكلة هى الركنة فى المكان ده فعمل حاجة بنسميها فى علم التسويق الباكينج Packing .
ودى واحدة من سبع حاجات اللى بيطلق عليها ال 7 P .
يعنى هو قدر عن طريق فكرة سهلة وبسيطة جدًا ومن غير ما يعرف إن ده علم ولا حاجة يحل مشكلة التعبئة بعمل وحدة ثابتة وجاهزة ويقدر أى حد يشتريها وهتوفر 90% من وقت الشراء وخطر الركنة فى المكان ده ..... المهم إنه شغل دماغه وتعب نفسه وعمل حاجة جديدة ....
بكره ممكن هتتقلد كتير بس هو قدر يضاعف مبيعاته ويكسب كويس .... شوف بقى كل واحد فينا بيقضى وقت قد إيه كل يوم يحلل فيه سلوك العملاء بتوعه ويطلع بحاجة جديدة يزود بيها مبيعاته ومكاسبه ؟
ده الفرق بين المبتكر واللى بيقلد وخلاص ... ياريت كل واحد فينا يحاول وهيلاقى طرق كتير وحاجات كتير تزودله مبيعاته من خلال تحليل سلوك عملاؤه .
وربنا يوفق كل اللى بيحاول يطور شغله

تسويق