اتصل بنا

تسجيل الدخول

مستخدم جديد

إتقان البيع - ج1

قراءة المقال باللغة الفصحى

الكاتب :

اعمل بيزنس

تاريخ النشر :

2016-12-29

مشاهدات :

721

شارك المقال

هابدأ النهاردة كلام عن حاجه مهمة جدًا فى أى بيزنس ومفيش بيزنس مابيحتاجلهاش ومع ذلك هتلاقى قليلين جدًا اللى بيتقنوها وحتى دول ممكن تلاقى اتقانهم ليها فطرى وغير قائم على سيستم أو طريقة وهى كيفية إتقان البيع 

يعنى إزاى تكون بتعرف تبيع ؟

مهم جدًا إننا نفهم إن البيع هو المهارة الأهم على الإطلاق فى حياة أى رجل أعمال أو رجل مبيعات وإن عملية البيع ما هى إلا عملية إقناع وإنك كرجل أعمال أو كمدير ببيع أو بياع بتبيع أى حاجة عن طريق إقناع أى حد بيشترى المنتج ولازم تتقن فن البيع اللى هو فن الإقناع 

أنا دورت كتير قوى من يوم ما بدأت شركتى من 18 سنة على مصدر يعلم البيع بشكل إحترافى ملقيتش ...لحد ما حد من فريق العمل وقع على كنز وهى سلسلة محاضرات جوردون بيلفورت أسطورة البيع فى العالم واللى تم تجسيد قصته فى فيلم شهير تصدر إيرادات السينما الأمريكية لفترة واللى قدر وهو عنده 26 سنة يبقى فى جيبه 50 مليون دولار من إتقان فن البيع 

ولك أن تتخيل إن الكورس ده اللى كون من 10 أجزاء لما بدأت أدرسه لبعض أعضاء قسم المبيعات عندى زادت مبيعاتهم بمقدار وصل مع بعض الأفراد ل 400% 

هابدأ كل يوم هاقول على شوية نقط أنا شايف إنها مهمة

أول حاجة على البيع أو وظيفة البيع دى عمل سئ أو شرير ؟؟؟

فيه قناعة ترسخت فى دماغنا إن وظيفة المبيعات دى يعنى عبارة عن نصب من الآخر والمشكلة إن المقتنع بكده بعضهم أصلًا بيشتغلوا بياعيين وده نتيجة إنهم بيمارسوا البيع من باب تحقيق مصلحة الشركة فقط دون النظر لمصلحة العميل ... من وجهة نظرى كواحد بيحب البيع وبيحب يمارسه البيع من أنبل المهام اللى أى حد يمارسها لو فعلًا بينصح العميل بما يناسبه ويحقق مصلحة الشركة و العميل فى نفس الوقت .

إيه هى مؤهلات أى حد عايز يتقن عملية البيع ؟

أى حد ممكن يبيع بس أى حد عايز يتقن عملية البيع لازم يكون :-

1- بيحب الفلوس جدًا .... مش عيب والله مادام الفلوس جاية من طريق حلال وقانونى ده غير إن الفلوس تتحب 

2-عنده قدره على اقتناص الفرص ..... الفرص كل يوم أدامنا لكن مش كلنا عندنا الاستعداد ولا القدرة على اقتناصها .

3-القدرة على العمل الشاق .... طبعًا كل السير الذاتية اللى الواحد بيشوفها فيها الجملة دى بس فى الواقع مش هتلاقى كتير .

خلينا ندردش كتير فى موضوع البيع ده لأنه موضوع محورى وهام لأى رجل أعمال أو مدير مبيعات أو بياع أو أى حد بيشتغل فى البيزنس بشكل عام ..... وربنا يوفق الجميع 

تسويق