اتصل بنا

تسجيل الدخول

مستخدم جديد

كيف تدير بيزنس وقت الأزمات ؟؟؟ ج5

قراءة المقال باللغة الفصحى

الكاتب :

اعمل بيزنس

تاريخ النشر :

2016-12-28

مشاهدات :

1727

شارك المقال

إتكلمنا في الحلقات اللي فاتت عن مميزات السوق وقت الأزمات وأمثلة عن كيفية استغلالها ... هنتكلم النهاردة عن عيوب السوق وقت الأزمات وهى نقط ممكن نكون كلنا عارفينها بس لازم نفهمها علشان نعرف إزاى نتغلب عليها من الحلقة اللى جاية ....

أولاً صغر حجم السوق وإنكماشه ....

ودى هى أهم نقطة تقريباً فى أزمة أى سوق وهي انكماش حجم السوق فبدل ما كان سوق الملابس مثلاً فى مدينة معينة هو مليون جنيه شهرياً بينخفض حجم السوق ده لنصف مليون مثلاً أو أقل أو أكتر على حسب حجم الأزمة .

ثانياً تغيُر أولويات المستهلك ...

فيه صناعات معينة ممكن تكون بتختفى أو تكاد تختفي نتيجة إن المستهلك أو العميل أولوياته بتختلف زى مثلاً في مصر صناعة البرمجيات الموجهة للشركات نتيجة إن دخل الشركات إنخفض نتيجة الأزمة فالشركة مثلاً بيبقى عندها الأولوية لدفع الإيجارات أو المرتبات مش للتطوير وإدخال نظم تكنولوجية حديثة ..... أو زى مثلاً صناعة الترفيه هنلاقى بعد ثورة يناير مباشرة كان فيه 6 شهور لم ينتج فيلم سينيمائي واحد وحتى الآن مرجعناش للإنتاج زى قبل الثورة .... المهم إن فيه صناعات بتتراجع أو بتنكمش وفيه صناعات بتتوقف بشكل كامل لفترة قد تطول وقد تقصر .....

ثالثاً التغييرات السريعة ....

من أهم وأكبر مشاكل السوق الغير مستقر أو سوق الأزمة هى التغييرات السريعة فى السوق واللي بينتج عنها عدم القدرة على التخطيط لمدى طويل أو حتى متوسط وده اللى السوق المصرى عايش فيه بقاله 5 سنين فبتلاقى أى حد قبل 2011 كان بيحط خطه لمدة من 3 ل 5 سنين ومبيحصلش تغيير كبير فيها ممكن تتحقق بنسبة 80% مثلاً إنما طبعاً فى ظل السوق الغير مستقر فأى حد بيحط خطة ل 3 سنين يبقي غلطان هو ممكن يحط خطه مبدئية لمدة 5 سنين بس يبقى عامل حسابه إنه يتابعها بشكل شهرى وممكن يغيرها بشكل شهرى أيضاً يعنى التخطيط الطويل والمتوسط بيكون رفاهية إنما لازم يبقى فيه تخطيط قصير المدى هو الأولوية والمتوسط والطويل بيبقى مكمل وطبعاً أكبر مثال على الكلام ده قطاع السياحة مثلاً اللى بيتأثر بالعمليات الإرهابية أو قطاع البرمجيات والاستيراد اللى بيتأثر بالتغير فى الدولار أو حتى القطاعات اللى بتصدر لدول الخليج الأيام دى بتتأثر بأسعار النفط والحروب فى منطقة الشرق الأوسط .

دول أهم عيوب أو مشاكل بيقابلها أصحاب المشاريع الصغيرة والمتوسطة وأحياناً الكبيرة فى السوق الغير مستقر واللى إحنا كمنطقة واقعين فيها بقالنا حوالى 5 سنين بداية من ثورات الربيع العربى ....

كده إحنا اتكلمنا عن مميزات السوق الغير مستقر وعيوب السوق الغير مستقر .. هنبدأ فى الحلقات اللى جاية نعرف إزاى نستفيد من المميزات ونتفادى العيوب فتابعونا وربنا يوفقنا كلنا على التغلب على ظروف السوق :) 

تسويق