اتصل بنا

تسجيل الدخول

مستخدم جديد

كل حاجة تسويق

قراءة المقال باللغة الفصحى

الكاتب :

اعمل بيزنس

تاريخ النشر :

2017-01-01

مشاهدات :

1575

شارك المقال

النهاردة هندردش بشكل أكتر عن التسويق وعايزين نفهم الأول إن التسويق مش بس إنك تسوق منتج ... فيه 10 أنواع للتسويق هى ( المنتجات – الخدمات - الأحداث (مهرجان سينيمائى - أسبوع تسوق ) – خبرة ( استشارات ) – أشخاص ( ممثل – مذيع- سياسى ) -أماكن (شرم الشيخ – دبى ) - حقوق ملكية ( أسهم – اسم تجارى – فرانشيز ) - منظمات ( أندية – متاحف - ساقية الصاوى ...الخ ) – معلومات (صحف – مجلات - كتب ) - أفكار ( الشيوعية – الرأسمالية - حملات الإقلاع عن التدخين - الوقاية من سرطان الثدى .
دى بالتفصيل العشر حاجات اللى التسويق بيهتم بيها علشان يسوقها أو يبيعها أو ينشرها ولما تشوف العشر حاجات دول هتفهم إن البيع مختلف عن التسويق تمامًا ... يعنى أنا لما بسوق أفكار مثلًا مش منتظر من اللى بسوقله إنه هيطلع فلوس ويديهاللى بعكس البيع اللى لازم فى النهاية ينتهى بفلوس بيدفعها العميل للشركة صاحبة المنتج أو الخدمة .....
ممكن نقول إن عملية البيع هى الفلوس فى حالة المنتج وهى التصويت فى حالة السياسى وهى الإعجاب في حالة الممثل وهى التشجيع فى حالة النادى ..... الخ . يعنى عملية البيع هى التتويج لسلسلة عمليات التسويق وهى اللى بتحكم على عمليات التسويق إن كانت ناجحة ولا لأ.
المهم إن التسويق عملية قديمة جدًا من أول ما الأنبياء بدأوا يقنعوا الناس بأفكارهم وتأثرت العملية دى بأدوات كل عصر من أول الخطابة والإقناع الشخصي قديماً لحد الإنترنت والفضائيات حديثاً وأى فكرة مقدرتش إنها تواكب تطور أدوات التسويق بتموت مهما كانت قوتها وكلنا شوفنا إزاى أمريكا استغلت هوليوود فى زمن الحرب الباردة علشان تنتصر على الإتحاد السوفييتى فى حرب طويلة استمرت حتى سقوط الشيوعية وانهيار الإتحاد السوفييتى .... برضه هتلاقى دايمًا فى معارك كل يوم بس انت مش بتحس بيها انت بتحس بنتايجها ....
"نوكيا" اللي كانت بتبيع 85% من الموبيلات فى مصر لحد 5 سنين فاتوا النهاردة بقت بتكافح علشان تفضل موجودة لغاية أما تم الاستحواذ عليها من شركة "مايكروسوفت" و"سامسونج" أخدت منها سوق الموبيلات علشان غيرت فى حاجة واحدة من أدوات التميز وهى المواصفات ( أدوات التميز اللى هنشرحها بعد كده هى 5 العاملين في الشركه – المواصفات – الخدمة – التوصيل – البراند ) "سامسونج" زودت فى المواصفات حاجة اسمها "الأندرويد" خلتها تكتسح سوق الموبايل بعد ما كانت بتكافح علشان تاخد 4% من السوق .
يبقى مش هيفضل موجود منتج أو خدمة أو مشروع أو كيان أو فكرة إلا اللى يقدر يفهم يعنى إيه تسويق ويطور نفسه بأدواته طول الوقت ويعرف الإحتياجات الحالية ويتوقع المستقبل .
هنتكلم بعد كده عن أنواع الشركات وإيه منها اللى بيعتمد على قوة التسويق وإيه منها اللى بعتمد على قوة المنتج ..... الخ

تسويق